سید الشعرا:

سید الشعرا:

اشرف سربازی
سید!
تو ۔ ۔ ۔ ۔ سید الشعراءِ
خبر زانتانی ۔ ۔ ۔ رھدربر
کھیبے سنبھینتگ تو۔ ۔ ۔
وتی ماتی زبانءِ، صد ھزار نازانی بانورءِ
‘گلیں گیوار‘ ۔ ۔ ۔
گوں ۔ ۔ ۔
مرواردیں گالاں۔

بلوچی ۔ ۔ ۔ اچ تو زندگ بوت۔
بلوچی ۔ ۔ ۔ تو ۔ ۔ ۔ پہ عرشءِ برت۔

چہ تئی مرکءَ ۔ ۔ ۔
نہ تھنا من۔ ۔ ۔
غماں بار و۔ ۔ ۔ شزار و ۔ ۔ ۔ وار و برباداں،
تمامیں بیل و ھمبل ۔ ۔ ۔
پلگدیں دست برادرانی مجلس و ۔ ۔ ۔
آ ۔ ۔ ۔ شاھی ایں دیواں،
درھا! ۔ ۔ ۔
پرسیگ و سوگی ۔ ۔ ۔
ترونگلیں ارسانی باھوٹ اَنت۔

خدائے ھست بیلاں کہ ۔ ۔ ۔
گش اَنت نام ئی ۔ ۔ ۔ رحمان اَنت!
کجام رحمان؟ ۔ ۔ ۔ و ۔ ۔ ۔
چونیں ۔ ۔ ۔ رحم؟
اے چونیں رحمے اَنت کہ ۔ ۔ ۔ قادریں رحمان!!!
چہ یک۔ ۔ ۔
ٹوہ و مزن نام و تواریں ۔ ۔ ۔ راج و قومےءَ ۔ ۔۔
چشیں ۔ ۔ ۔ دوستاک و گھہ واھیں و سولیں پسّگے۔ ۔ ۔
پچ گیپت۔

دنیگا!
عمر آئیءِ ۔ ۔ ۔ چو نہ ات کہ ۔ ۔۔
ملکموت ۔ ۔ ۔
بئیت و کپیت رندا۔
سید!
یک عامیں انسانے نہ ات کہ ۔ ۔ ۔ ملکموت!
ھر وھد ۔ ۔ ۔ دل ئی لوٹیت ۔ ۔ ۔
وتی ۔ ۔ ۔
ھینّار و ترسینوک و تیز و زوم سریں ۔ ۔ ۔ جکّاں!
۔ ۔ ۔ بہ دنت بُک۔
آ ھم! ۔ ۔ ۔
ظھورشاہءِ ھزار گنجیں ۔ ۔ ۔ دل و گٹّا۔

ھزار افسوز!
کہ ۔ ۔ ۔ من ھم دیست ۔ ۔ ۔ و۔ ۔ ۔ تو ھم ۔ ۔ ۔ دیست

ظھورشاہ ۔ ۔ ۔
گر چہ بیران بوت ۔ ۔ ۔ بلہ ۔ ۔ ۔ نام ئی ۔ ۔ ۔
نمیران اِنت ۔ ۔ ۔
نمیران اِنت ۔ ۔ ۔
نمیران اِنت ۔ ۔ ۔
نمیران اِنت ۔ ۔ ۔