اگاں جھد ءِ نشانگ چَہ لیکو ءَ زِبھر بہ بیت گڑا بِھ سوبمند نہ بیت 

 ' ڈاکٹربشیرعظیم

بام ھال

شال : بلوچ ری پبلکن پارٹی ءِ بنجاھی کارگشاد ڈاکٹر بشیر عظیم ءَ گوشتگ کہ ماتیں گلزمین ءِ شھید جلیل ریکی ءَ شاہ شھیدان نواب محمد اکبر خان بگٹی ءِ پگر ءُ لیکو ءِ سر ءَ وت ءَ مھکمی داشتگ ءُ بلوچ دژمنیں ریاست ءِ واک ءِ دیم ءَ سر جھل نہ کرتگ ءُ پہ ماتیں گلزمین ءَ وتی جان ندر کرتگ ،بلوچ راج تپاک ءُ یکجاہ بہ بیت ۔ اے ھیال آئی ءَ گوستگیں روچ ءَ شال ءَ شھید جلیل ریکی ءِ یات ءَ بوتگیں دیوان ءَ گپ جنان درشان کرتگ اَںت ۔ دیوان ءَ مزنیں کساسے ءَ بی آرپی ءُ بی آرایس او ءِ جھدکاراں بھر زرتگ ۔ ڈاکٹر بشیر عظیم ءَ گوشتگ کہ بلوچستان ءَ راجی سیاسی جھدکارانی چَہ راھبنداں دریں دزگیری ، آوار جنگ ءُ تیر جتگیں میتانی دزکپگ گوں یک درچ ءَ برجاہ اِنت بلکیں ریاستی جبر ءُ زوراکیانی تہ ءَ روچ پہ روچ گیشی آیان اِنت۔

شھید جلیل ریکی بالادی ھساب ءَ چَہ ما سندگ بوتگ بلے ریاستی واکدار اے نہ زان اَنت کہ جلیل ریکی ءَ پہ ھما مزنیں مول ءُ مراد ءَ وتی زند ندر کرتگ ءُ پہ ماتیں گلزمین ءَ شنک بوتگ آ پگر داں منزل ءَ سربوگ ءَ زندگ ءُ درپشناک مان اِیت ءُ زرمبش ءُ راج لیکو ءِ پھتوی ءُ یکشلیں جھد ءَ گوں مھکمی چَہ درساں مستریں سِلاہ اِنت ۔ اگاں جھد ءِ نشانگ چَہ لیکو ءَ زِبھر بہ بیت گڑا جھد بھ سوبمند نہ بیت ۔ بلوچ آجوئی ءِ زرمبش وتی ابرمی بستار ءَ یک لیکوی زرمبش اِنت اے ایوک چَہ زوراک ءَ وت ءَ سندگ ءُ یکگور کنگ یا یک زمین ٹکے ءِ آجوئی ءِ نہ اِنت بلکیں راستی ءَ یک چَہ پلمالے ءَ پاکیں لیکوے ءَ بالادست کنگ ءِ زرمبش اِنت ۔ ظلم ، جبرءُ زورگری ءِ تھاروکی ءَ اے شھیداں وتی ھون ءَ گوں ھما کندیل روک کرتگ ءُ دیم ءَ روان اَنت ۔ ماتیں گلزمین ءِ کنڈ کنڈ ءَ شھیدانی ھون ریچگ ءَ اَنت ءُ کنڈ کنڈ ءَ شھیدانی میتگ آباد بوگ ءَ اَنت کہ ھمے وژنامی ءُ شھادت ءِ درچ اَنت ۔ بلوچ ورنا ھانی دیم شریتگیں میتانی درچ بلوچ آجوئی ءِ زرمبش ءَ میل ءِ سنگ ءِ بستار دار اِیت ۔ بلوچ گلزمین ءِ پسگاں وتی سینگاں تیر وارتگ ءُ نہ ایوک وتی آجوئی ءِ جھد نوکیں سنچ داتگ بلکیں آجوئی ءِ جھد ءِ لیکوی چیدگ ھم گیشینتگ ۔آئی ءَ گوشتگ کہ آ ماتیں گلزمین ءِ شھید ءُ شاہ شھیدان ءِ پگر ءَ وتی راھشون بہ کن اَنت ءُ وتی جھد ءَ تیزتر بہ کن اَنت ءُ پروش ءَ دژمن ءِ بھت نوشت جوڑ بہ کن اَنت ۔