شما سرپد اِت؛ دانکے پہ بلوچی نیوزءِ وانوکاں

 

 شما سرپد اِت؛ دانکے پہ بلوچی نیوزءِ وانوکاں

بلوچی  نیوزءِ گرانقدریں چاروکاں منی ڈولا شما سرپد اِت کہ بلوچی زبانا وانوک کم اَنت۔  گیشتریں بلوچی وانوکانی جند نبیسوک اَنت و گیشتر بلوچی نبیسوک شاعر اَنت۔ اے حسابا  اگر چارگ بہ بیت، گڈا من گوَستگیں پنچ سالاں گوں اے بلاگءِ شنگ کنگا وتی وھد  باھینتگ۔ البت، من چوش نہ لیکاں۔ اگر سرجمیں سیتاں کسے ڈالچار بہ کنت، ایوکا منی  جندءِ بلوچیءِ شرتر بیگ منی خیالا منی داتگیں اے وھدءِ لایق اِنت۔

اے پنچیں سالانی تھا من بلوچی نبیسگءِ بازیں وڑ چکاستگ اَنت۔ ایشانی باروا منا لھتے وانوکانی راھشونی ھم رستگ اَنت۔ ایشانی نیاما کمتر مردماں منا ساڑایتگ و گیشتراں منا گشتگ کہ من رواج گپتگیں بلوچی راھبندا یلہ مہ دیاں۔ وھدے کہ شہ ایشاں من جست کتگ کہ رواج گپتگیں راھبند کجائی اِنت؟ گشتگ اش کہ سیدءِ راھبند۔ پدا من دیستگ سیدءِ راھبندا گوں منی چکاستگیں راھبندا بس لھتے چیزاں فرق کتگ۔ آدگہ پھک ھما سیدءِ راھبندا من نبیستگ۔

فرق ایش بیتگ اَنت کہ من سیدءِ دور داتگیں آب ح، خ، د، ذ، ص، ض، ع، غ، ف، ق کارمرز کتگ اَنت۔ پدا ”ءَ“ ءِ کارمرزیءِ پڑ من کمے نز آرتگ۔ ایشاں در بغیر دگہ لھتے کسانیں بدلی من وتی سیاھگ ”سید راھبندا لھتے بدلی ھژدی اَنت“ءِ تھا شون داتگ اَنت۔

ھنیگیں دور ستا و شاباشیءِ دور اِنت۔ شاباشی مردما ھمودا رسیت کہ مردم کسےءَ کچّہ مہ چَنت۔ ھما سرحال کہ شِروک بہ وارت، ھمایی اگر دیما برگ بہ بیت، گڈا بازیں کس واہ واہ کن اَنت۔ بلہ اگر ندارگءِ دومی دیما کسےءَ شون بہ دیئے، گڈا ھر کس گٹا لونجان بیت۔

پمیشا منی گمانا من اے سالانی تھا پہ وت بازیں بدواہ جوڑ کتگ اَنت۔ پرچاکہ پہ مشکلیں زبانےءِ رواج دیگا مردما تھل تریں سرحال گچین کنگ لوٹ اَنت۔ اگر چوش مہ کنئے، گڈا مردماں شیرکنیں گپاں شیرکیں زباناں وانگ ھیل کتگ۔ پہ مئے قوما مرچی شیرکنیں زبان فارسی و اردو اَنت، و وانندہ تریں مردم انگریزی ھم وان اَنت۔ بلوچیءِ وانوک ظاھر نہ اَنت۔

ادا من اے گشگ نہ لوٹاں کہ نیں من شہ بلوچیءَ دستاں کشگا واھوکاں۔ اگر واھوک بہ باں ھم منی ھیل منا یلہ ندات۔ من بلوچی نبیسگا شہ وتی ھما ھیلاں یکّے مارگایاں کہ گوں من تانکہ قبرا ھمراہ اِنت۔ ھو، ایشیءِ سرا من پھر بنداں۔ من ادا اے گشگ لوٹاں کہ نیں گشیگا منا کموک وانگ نیمگا دلگوش دیگءِ ضرور اِنت۔ پرچاکہ وانندویں مردمءِ سیاھگ ھم علمی تر بی اَنت؛ من ھمے جھدایاں۔ پمیشا اگر زیت زیتیا بلوچی نیوزءَ نوکیں حال گیش کنگا من گون نہ کپتاں، منا پھل کن اِنت۔

شمئے کستر

ولید گربنی 

http://www.balochinews.com/